Narradores/as

No meu mundo
Mirádeme aos ollos. Gústame ver a miña imaxe reflectida nas pupilas das persoas que me miran… Gústame pensar que dentro dos demais hai un “eu” pequeniño… Cada mundo interior é apaixonante… Quen sabe? Quizais eses mundos tamén sexan o meu mundo.

O retorno dos homes mariños

Xurxo Souto converteuse, por dereito propio, no narrador que mellor sabe ler o mar galego.

Neste espectáculo rescata un mito coruñés esquecido. “As veces téñense visto nesta praia algún peixes da mesma figura que homes e en todo se lles parecen, fóra que teñen mans e pés un pouco tortos por razón de andar sempre nadando como as ras. A estes peixes, por semellárense tanto aos homes, chámanlles homes mariños.” Tal escribiu Jerónimo del Hoyo, cóengo da catedral de Santiago, tras visitar A Coruña no século XVII.

A señora Laura, a sabia do mar, sabe todo o que se pode saber dos homes mariños. E Mercedes, que tamén é a protagonista da novela «A gran travesía de Chiruca Macallás», traballa nun taller téxtil. É «heavy» e soña con marchar polo mundo co seu conxunto musical. Cada noite, no taller, máis forte que o boureo das máquinas, sente unha voz que a chama: a canción do mar do Orzán.

CONTOS PARA BEBÉS – “CANDO CHOVE E VAI SOL”

Trátase dunha sesión na que os participantes escoitarán pequenas historias apropiadas para as primeiras idades, historias que falan das cousas cotiás enlazadas con ditos e cancións tradicionais e algunha composta adrede para a función.
As cores, as formas, os sons, o xogo e o ritmo conforman o seu eixo. Esta sesión vai dirixida aos bebés até 3 anos que poderán seguila dende o colo da súa nai, pai ou adulto que os acompañe que gozará igualmente destas pequenas historias e xogos. A compañía dos adultos é imprescindible pois serve de nexo entre os narradores e as crianzas.

O número de crianzas participantes será como máximo de 20. Poderán vir acompañados de un ou máis adultos se a capacidade da sala o permite, xa que consideramos importante o feito de que as persoas que se relacionan acotío cos cativos ademais de xogar con eles durante a sesión repitan estes xogos na casa e tamén lles sirva para lembrar outras cancións, xogos e contos.

OS CAMIÑOS MÁIS LONGOS

O camiño máis curto acaba sen decatarte, e con el a viaxe, na que te vistes dunha persoa que tamén es ti, pero con outra roupa.

O camiño máis longo ten perigos, medos, lobos, espellos nos que te vas recoñecendo, refuxios, misterios, segredos.

Hai quen prefire non arriscarse, nin deterse, só asomar un chisco a cabeza por curiosidade.

Pero hai quen escolle o camiño máis longo, e escolle tamén o seu propio tempo, o de escoitar os contos para lembralos no regreso.

Cada conto desta sesión transcorre nun camiño, ou en varios, os que queiramos seguir.

RAMONA ÓRBITA, A DONA DO TEMPO | Concerto | público infantil e familiar | 60 minutos

En este espectáculo Pakolas preséntanos o seu último libro disco, editado en Sonárbore, na Editorial Galaxia (agosto 2020). Neste novo traballo contaremos e cantaremos a historia de Ramona Órbita, unha muller labrega da Serra do Courel, que posúe unha horta cibernética con patacas automáticas, e ademais ten unha máquina do tempo, o seu mellor invento. Con ela viaxa ao futuro e ao pasado na procura de tecnoloxía para crear un mundo mellor, mais ecolóxico e con enerxías limpas.

Así, a través das cancións e a narración, imos saltando a diferentes épocas. Ramona viaxa á prehistoria a comer churrasco de mamut con Manolo Cavernario que acaba de descubrir o lume, visita a Leonardo Da Vinci no Renacemento, acode ao Antigo Exipto cun tal Ramsés que lle cheiran os pés, ou conversa cun robot que ten unha Roda Rota que se fai chamar Time, etc, todo ata chegar a Benvidas ao Futuro na que cantamos por unha sociedade mais ecolóxica e concienciada co respecto e coidado á natura.

Moitas personaxes poderedes atopar nos seus libro discos, con historias das que aprender e gozar a ritmo moi rockeiro. En definitiva, un espectáculo para compartir cos mais peques e coa familia. Pakolas incluirá nesta montaxe algún dos seus éxitos anteriores, dos mais aclamados polo público.

GALICIA MÁXICA

Galicia máxica é un espectáculo de narración cheo de contos tradicionais galegos, romances, cancións e xogos da nosa tradición.  Esta proposta é unha viaxe pola Galicia máis sorprendente, chea de seres máxicos, cancións, xogos e tradicións que gardan con elas costumes e sentires dun pobo.

Narración oral, música e manipulación de obxectos para poñer en valor e achegar a nenas e nenos o noso patrimonio cultural de forma divertida.

CANTA, BUGUINA, CANTA! | 0-3 anos | 40 min | Galego

Soprando a nosa buguina, comezaremos a viaxe polo mar. Visitaremos illas onde viven caracois, galiñas poñedoras e vacas. Regaremos a herba. Xogaremos coa marea que sobe e baixa. Cantaremos cancións sobre a lúa e faremos barcos de papel para continuar viaxando lonxe. Brincamos coa imaxinación recreando animais con obxectos, barcos e illas de papel, un mar de tea ao son da música e as palabras.

Canta, Buguina, canta! é un espectáculo para primeira infancia que ten como obxectivo xogar coa palabra e a poesía, coas cancións e contos, cos xogos visuais e sonoros que serán o berce da literatura.

Litorrelatos de Compostela

En Compostela hai moitas pedras que dan testemuña do que aquí foi acontecendo.

O cincel imprimiu mensaxes esquecidos e as pedras faladoras permanecen coma páxinas soltas dun libro de memorias da cidade, mostrando capas da súa cebola histórica.

Neste paseo dende Santa Clara ata a Quinta Angustia, imos ler nas pedras todo tipo de documentos: actas de restauración, relatos gráficos, citas textuais, títulos de propiedade, contos, sucesos, soños, lendas, biografías…

Todo eso inscrito nas ignoradas pedras da contorna da Almáciga.

Tralo rastro do sangue das pantasmas | roteiro

Compostela é unha cidade construída ao redor dun morto. Pero as súas pantasmas -as súas historias de pantasmas- poucas veces pasaron a ser parte do rico imaxinario da cidade. Este paseo comentado pretende explorar a gran riqueza fantasmal da cidade, a través de aves de ultratumba, nenos desaparecidos, apóstolos vingativos, anciás desconsoladas, espiritistas, voos astrais, cabaleiros atormentados e peregrinos fake. Este itinerario, baseado no libro O sangue das pantasmas de Manuel Gago, será un camiño entre a realidade e a ficción, entre a imaxinación e os feitos que están -e continúan estando- na forxa dunha cidade única.

Heroes que durmen, heroes que resisten, heroes que mudan | conferencia

Gregos e romanos estaban convencidos de que os homes, a diferencia dos deuses, só podían ser inmortais cando acadaban unha sona tan definitiva que xa nunca puidera ser esquecida. Pero para as culturas atlánticas, os heroes poden ser esquecidos e revivir, tras un longo soño nas illas, cando os tempos son chegados; os heroes galegos teñen a propiedade de mudar de pel para vivir agachados no futuro. Esta intervención no castelo da Frouseira, de a cabalo entre a narración oral e a conferencia, explora os sinuosos mecanismos de resiliencia, resistencia e subversión polos que na cultura galega, entre o culto popular, a tradición oral, as mitoloxías inventadas e a memoria colectiva, se forxan os heroes que viven, presentes ou agachados, no noso imaxinario.