PARTICIPANTES

CONTOS ARREDOR DA TERRA | Adultos
Partindo da narración oral e mesturándoa con elementos do teatro xestual e de figuras, Alba de Vales ofrécenos a tradición oral que percibiu e procurou nun compendio de pezas contadas e cantadas.

Co “O rato e a rateira”, relato anónimo recuperado dun vello almanaque labrego que a xograresa reconta á súa maneira, ou “Os tres casamentos nun día”, romance burlesco popular, recollido na súa propia aldea por terras de Cea, e que libremente interpreta, ou a través dunha cántiga tradicional que mestura estilos populares de Galiza e da península ibérica, unha xograresa búscase a si mesma, neste século, tecendo con historias, cantos e contos as preguntas sobre ser xograresa, ser galega e galegofalante, e sobre a tradición ou a ruralidade. Re-interpretándose nas historias do seu lugar de orixe e dunha raíz expandida, que vai e retorna.

Visita guiada ao Castro das Barreiras (Vimianzo)

O Castro das Barreiras, en Vimianzo, é un dos enclaves castrexos máis destacados da Costa da Morte e nestes momentos atópase en plena campaña de escavación arqueolóxica. Esta visita guiada permitirá coñecer os avances máis recentes da investigación da man do seu director, o arqueólogo Tito Concheiro. Un percorrido fascinante para achegarse á complexidade deste poboado fortificado e aos novos descubrimentos que están a saír á luz neste 2025.

Historias para coidar a Terra | Público familiar | En galego

Dúas horas de contos na casiña da árbore, proxectados no Palleiriso, pescados nas barcas e prantados en Carballolandia.

Vicio houbo sempre | Público adulto | 60 min
Vicio: Hábito ou costume de actuar de maneira contraria á moral ou ás normas sociais establecidas.
Os últimos anos Atenea García estivo recollendo historias de vida de mulleres de máis de 85 anos que moitas veces remataban falando de pracer e de sexualidade. A primeira conversa naceu cunha frase: “Vicio houbo sempre, gracias a Dios!” E logo seguíronlle outras tantas: “Eu nacín moi cedo”, “Iso antes non che era así” ou “Ai se fora hoxe…”. Así as mulleres foron falándolle de todas esas cousas supostamente prohibidas e deixando entrever que aquilo de chegar virxe ao casamento pasaba ás veces pero outras non, que sempre houbo vida nas marxes! Atenea recolleu as súas historias e preséntaas nesta proposta de narración oral para adultas.

Corochas | 0-3 anos | 40 min
Corochas é un espectáculo de pequeno formato dirixido á primeira infancia que combina a narración oral, a manipulación de obxectos e a música. A través do conto acumulativo, da canción e xogo de imitación viaxaremos por diversas paisaxes e coñeceremos personaxes estrafalarias que deben resolver múltiples enredos. Corochas, cachogas, celigras, cóchegas, coscas, deligras ou cóxegas: sensación que experimenta alguén ao lle seren tocadas levemente certas partes do corpo e que se manifesta nun riso involuntario. Por que será que existen tantos xeitos de chamarlles ás corochas? Pode ser que a sensación para cada unha de nós é tan diferente que non somos quen de lles poñer un nome só? Ou será que as corochas só existen á beira do mar e as cóxegas no alto da montaña… Os contos ás veces son coma as corochas, fannos viaxar a lugares onde normalmente non chegamos ou a partes do corpo ás que non lles poñemos atención.

Canto conto temos!
En todas partes pasan cousas que merecen ser contadas. Algunhas son pequeniñas, outras dan para un guión de cine ou televisión. Algunhas cousas só pasaron nese sitio, outras pasaron tamén noutro, pero só alí pasaron como alí. E hai cousas que non pasaron alí pero, oes, talmente como se tivesen pasado alí! E non son cousa do pasado os contos, non. Conto algún que saíu de poñer a orella nunha conversa de bar.

Canto conto temos!

Pero é que cada sitio é un mundo e cada conto é unha gran historia.

GARAVANCIÑA | Infantil (+1 ano) | 50 min

Garavanciña é unha proposta de narración oral que trae a maxia dos contos clásicos. Nesta adaptación, dáselles unha volta aos roles tradicionais mantendo a fantasía desta fermosa historia. Un conto de sempre que achega os costumes do pobo.

TERMANDO DOS MARCOS | Concerto

Despois de toda a emoción de Vinculeiras, chegou a merecida calma e puidemos erguer con paciencia o que é o novo proxecto das Bouba.
A lume lento e un bocado máis maduras, reparamos en nós e no mundo e creamos algo novo, pequeno, local, desde as marxes.
Máis ca nunca resituámonos na aldea que nos pariu, a que nos dou o nome e nos mostrou que sen nós non había futuro. Non é esta cousa boa de facer nun país cada vez máis asobalhado polo capital e a desmemoria.
Aquí estamos, Bouba, para seguir sendo, Termando dos marcos. Os marcos somos nós.

Á MAKHÁ, MÃE TERRA | Familiar | 60 min
Sesión de contos e cánticos de poder dedicada aos indios norteamericanos. Un encontro coa ancestralidade e a sabedoría profunda da natureza.

Contar para vivilo | Público adulto | 60 min

Unha sesión de historias, contos, lerias e parrafadas sobre outras xentes, outros mundos e outros tempos, nun espectáculo para xente deste mundo e deste tempo. Humor, emoción e memoria coa palabra como único recurso.

O QUE NON ESTABA ESCRITO | Público adulto | 75 min
O espectáculo ten este título porque os relatos que Carmen conta non estaban escritos (certo!), mais tamén polo extraoficiais e polo especiais que son! Inspirados en todo canto apañou da oralidade, ficcionados pola propia Carmen nunha mestura indistinguible entre realidade e imaxinación e devoltos á voz falada, a través das narracións desta sesión para público adulto. Unha escolma na que ata a vida máis anónima roza o improbable e a maior normalidade choca co delirio.

DE CANTOS Y ANIMALES | Adultos
Cántase ás vacas nas chairas de Colombia e Venezuela, aos bois nos campos de cultivos de Bután. Nas montañas de Marrocos, pastores de rabaños e cazadores de serpes amansan os animais con melodías das súas frautas. Cántase para aquietar, para que baixe o leite, para guiar polos camiños, para arar a terra, para acompañar a soidade. Cántase a viva voz ou con instrumentos cuxa mesma anatomía aparece entrelazada coa do animal e da vexetación que o rodea.

Que significado teñen estes cantos? Nun momento puidemos comunicarnos mediante a música con outras especies? Compartiamos con elas un mesmo idioma? Era iso o paraíso?

De cantos e animais narra en primeira persoa un percorrido de oito anos no que Carolina Arabia transita entre voces de humanos e animais e recolle unhas manifestacións culturais que parecen destinadas ao esquecemento.

CONTOS A PÉ DE RÚA | Público infantil | 60 min | En galego
Neste espectáculo un barrendeiro fai unha entrada inesperada e ante un público expectante decídese a contar algún dos contos que le mentres limpa nas bibliotecas e os colexios municipais. Algunhas veces contos de medo, outras contos cheos de fantasía, contos tradicionais… todo misturado con xogos, cantigas… un plan perfecto para escoitar sentados co cu no chan e os pés coma os indios.

GRANDES ÉXITOS: 2004 – 2024 | Público familiar (+4 anos) | 60 min
Neste ano 2024 Caxoto cumpre 20 anos enriba dos escenarios contando contos por toda Galicia e media España. En todo este tempo o conto foi o principal ingrediente do seu traballo… pero non o único! Se os contos foron o sal, a música foi a pementa.
A través das cantigas tradicionais, dos xogos musicados, dos instrumentos peculiares,… Caxoto foi xuntando todo un amplo repertorio musical que vai dende o jazz chairego de Manuel María, á bossa nova mariñeira, pasando pola nosa rica tradición musical e as cantigas infantís de toda a vida. E todo no mellor acompañamento musical posible: Gaita, pandereta, ukelele, whistle, acordeón, birimbao, xilófono…
Para celebrar as dúas décadas vivindo do conto, Caxoto fai unha selección de todas estas cantigas, contos e xogos neste Grandes éxitos 2004-2024. Un espectáculo divertido e participativo para todos os públicos… e todas as gorxas.

DO MONTE AO MAR TODO É CONTAR | Público adulto | 75 min

Somos aves de paso… somos auga do río… con estas imaxes evocamos os momentos no conxunto, con principio e fin, e o resultado desta capacidade pódenos poñer melancólicos, e a melancolía é propensa a buscar táboas de salvamento nas historias que nos contamos, buscamos no sentir común a permanencia.

Retratos en branco e negro | Público adulto | 60 minutos
Cando fotografamos en cor, retratamos as vestimentas, a paisaxe, a superficie coa súa profusión de tonalidades, pero cando facemos unha foto en branco e negro, retratamos algo atemporal, case espectral, que apunta a alma do mundo.
Retratos en branco e negro imaxina unha serie de relatos nos que os lugares e as personaxes transitan dun conto ao outro creando un universo de ficción ateigado de grises: relatos entre o real e o extraordinario, entre o vivido e o soñado nos que late a tradición oral.

A VENDEDORA DE FUME | Familiar

Chafallas vai de vila en vila buscándose a vida, conta historias dos seus obxectos máis prezados e entretén á xente en troco de comida ou algo de diñeiro. Sabe facer de todo, ás veces sáelle ben, outras… non tan ben, pero o que si fai é poñerlle moi boa intención. É nómade, vai coa súa casiña ás costas e coma un caracol, leva historias enroscadas. Entende o idioma dos animais, é unha sabia da natureza e, sen sabelo, a primeira muller narradora que vive do seu oficio. As noites sen teito non son fáciles; e para pasalas, enreda coas palabras e a música ata durmir paseniño e que o fermoso son da alborada a esperte.

MURMURABAN AS MIÑAS VECIÑAS | A partir 12 anos | 60 min

Historias vivas recollidas para ser contadas de viva voz, aquí presentadas coma unha instantánea, coa humilde intención de que permanezan nalgún lugar. Contos de catro mulleres bravas do Morrazo, que levaron a vida que querían levar. Unha mestura entre a ficción e a realidade contadas sempre desde o humor. Para pasar da emoción a risa sen decatarse.

HISTORIAS DESDE O OUTRO LADO DA RAIA | Infantil e familiar (+3 anos)

Desde o outro lado do Miño, hai contos que se foron contando alén do tempo. Pasaron de avós a nais e destas ás crianzas que foron máis tarde pais. Contos fantásticos que van cruzar a fronteira imaxinaria. Contos da tradición lusófona, lonxe no espazo mais que imos sentir moi pretiño.

CONTOS DE REVOLUCIÓN. ENTRE BRASSENS E NEIRA VILAS | Adultos | 60 min
Disque cando unha bolboreta axita as súas ás en Australia, pode provocar un furacán en América. Tamén chamada teoría do caos. A revolución do caos, non chega cunha bolboreta, nace con Neira Vilas, mellor con Memorias dun neno labrego, e xa non hai volta, arrástrao todo. Unha revolución que nos vai levar desde Bos Aires ata a caída do muro de Berlín. Esta viaxe vai facer parada en maio do 68, nas barricadas de París, na chegada dos Tamara á sala Olympia e nos movementos anarquistas acompañados de Brassens. Unha banda sonora en francés que nos vai acompañar neste camiño da revolución provocada por Memorias dun neno labrego.

RÓTULAS URBANAS

Dende o seu nacemento dunha cidade, a historia e os que formaron parte dela deixan a súa pequena aportación, coma se alguén estendese un papel en branco e comezase a debuxar, e dende entón, progresivamente e sen parar, ese bosquexo vaise continuado polos tempo e as persoas.

Mais non está rematado, e agora é a nosa quenda.

O que hoxe habitamos é o resultado desa complexa e longa relación entre os pobos e o medio. Herdamos espazos froito dun lento proceso construtivo no que estiveron presentes todo tipo de variables, que condicionaron as intervencións humanas e as pegadas deixadas ao longo da historia. E é precisamente esa interacción concreta a que nos permite falar da identidade dun territorio.

Propoñemos un paseo “descubrimento” por ese Ourense, desenmascarando espazos, edificios, fitos que marcaron a historia urbana desta cidade, e que a fixeron como é.

Ás veces serán magníficas arquitecturas, outras arquitecturas desas que permanecen silandeiras e simplemente dan unha resposta correcta ao programa de necesidades e provocan felicidade. Ou prazas, rúas e cruces que percorremos na nosa vida cotiá e que quizais pola súa proximidade non apreciamos, lugares ao final da rúa e que non vemos, que pasan desapercibidos.

Todas, as mais recoñecidas e as mais invisibles, son rótulas urbanas que dalgún xeito decidiron a evolución urbana de Ourense.

ROTEIRO POLA RÍA DE FERROL
Antes de embarcar na lancha imos deternos en comentar algúns dos lugares máis representativos do barrio de Ferrol Vello, o primeiro núcleo de poboación da cidade: a rúa do Castro coa orixe no castro marítimo, a rúa do Espíritu Santo na orixe do Camiño Inglés e as vivendas mariñeiras de balconada de madeira, A Cortina, como parte do muro defensivo do Arsenal militar e a Sala de Armas, emblema da arquitectura neoclásica do século XVIII.Ao longo do periplo marítimo imos falar da configuración xeográfica da ría como determinante na elección da Base Naval do noroeste peninsular no século XVIII. E tamén haberá tempo para A Graña (de primeiro arsenal e Estaleiro Real a partir de 1726 a Base Naval), a polvoreira do Vispón, as fortalezas defensivas dos castelos de San Felipe, San Martiño e A Palma, as baterías defensivas de San Carlos, San Cristovo, Cariño, Viñas, Caneliñas, Prioriño Chico e Doniños e, por suposto, Mugardos.

POR LOS CAMINOS DEL NORTE: UN PUENTE DE CUENTOS ENTRE TRES TIERRAS CELTAS | Adultos | 60 min
Inés Álvarez chega desde o seu fogar en Edimburgo para contar contos tradicionais e compartir experiencias persoais que se entrelazan, explorando os vínculos culturais e emocionais que atopou no seu periplo vital por terras asturianas, irlandesas e escocesas.
Este espectáculo é unha celebración do poder da narración para crear pontes que nos unen a través do tempo, as fronteiras e os mares.

ESCOCIA DE CUENTO | Familiar | 60 min
Selección de contos tradicionais do rico folclore escocés. Estes contos están poboados por seres máxicos tan fantásticos e poderosos como as paisaxes que habitan nas pequenas vilas, os suaves outeiros ondulados e os verdes vales de Escocia e das illas británicas.

Xela a superheroína de aldea | Público infantil e familiar | 45 min

Na aldea hai unha chea de aventuras desexando ser vividas. Calza as botas, explora a natureza que te rodea e quererás coidala sempre.

Historias de filandar | Público adulto
Neste espectáculo o romance e o conto tradicional vanse zarrapicando da xeografía, da vida das cociñas, dos traballos do campo, das historias de vida de cada informante, e de cada vella que entra e sae do escenario da man deste zamorano. Funciona como un exercicio de agradecemento a quen lle regalou o testemuño dun mundo oral, e aspira a ser, para quen escoita, unha volta ao tempo feliz no que a palabra do vello era necesaria

HISTORIAS DE IDA E VOLTA | Familiar (+4 anos) | 45 min

Neste repertorio Larraitz compartirá historias que foi descubrindo no seu percorrido vital entre a súa Euskal Herria natal e Galiza. Un paseo emocional de ida e volta con cosmovisión feminista. Contos populares, mitoloxía e tradicións de ambas identidades culturais.

Meu mar | Con Caxoto
Un espectáculo de narración onde dúas beiras se atopan
Desde a illa ata a península, Meu mar propón unha travesía emocional e poética na que dúas voces —unha canaria e outra galega— se deixan levar polas correntes para atoparse no territorio común das historias.
Neste encontro íntimo, o mar é máis que escenario: é memoria compartida, é ponte e é espello. Laura e Caxoto, cunha voz enraizada nas súas terras pero aberta ao diálogo, fían contos que cruzan océanos e nos levan por camiños de salitre, vento e palabra viva.
Meu mar é unha homenaxe á oralidade como canle de encontro, á identidade que flúe, e á forza das historias que se contan desde as súas orixes pero sen fronteiras.

CUCÚ TAPA O CU | Familiar (+3 anos) | 60 min

Obradoiro familiar cheo de xogos e enredos da noso patrimonio cultural inmaterial como son os contos, trabalinguas, adiviñas, recitados, cantiga e bailes de roda gardados na memoria das persoas máis vellas.

Sesión chea de ritmos, rimas e recordos que viven en nós dende incluso antes de nacer como é o pun, pun do corazón xestante. Nesta actividade as familias poderán adquirir ferramentas parabrincar coas crianzas en calquera contexto e lugar. A lingua é o xogo máis accesible e versátil.

Actividade recomendada para familias con crianzas a partir de 3 anos. Adaptable a grupos de maior idade.

CROCODILO | Público familiar (+4 anos) | 50 min
Dun ovo pode saír un pitiño… ou un crocodilo! Nesta sesión chea de humor e tenrura, Loreto Socorro convídanos a escoitar contos que celebran a diversidade e a importancia de aceptarnos tal e como somos. Con rimas de mans e moita participación, Crocodrilo é unha proposta divertida e agarimosa para gozar en familia.

BONDADE | Público adulto e adolescente
Hai silencios que agochan xestos pequenos, e xestos que agochan mundos enteiros. En Bondade, Loreto Socorro fía historias nacidas do mar e do campo de Gran Canaria, relatos de xente común que escolleu –ou non puido deixar de escoller– a xenerosidade como camiño.
Contos que preguntan sen dar resposta: nace a bondade ou faise? É entrega ou defensa? Un espello ou un desexo? Nesta sesión íntima, as palabras acariñan a memoria das mulleres e dos homes que, con mans caladas, fixeron do coidado un acto de rebeldía.

Xogos musicais | Nenos 3-6 anos | 45 min
Obradoiro que achegará cantigas, recitados, danzas e xogos cantados e bailados para iniciar aos cativos e cativas nas melodías e ritmos tradicionais, traballando a psicomotricidade, o sentido do ritmo e desenvolvendo unha actividade musical en grupo.
As cantigas estarán acompañadas por música en directo, presentando aos participantes os diversos instrumentos empregados.
Con Samuel Soto.

Prende no colo | Bebés (0-3 anos) | 45 min
Sesión musical para aprender cantigas, cantos de berce, xogos de dedos, recitados e outras pezas pensadas para iniciar as crianzas na linguaxe, no ritmo e na melodía.
Con Samuel Soto.

MAPA DE SERES MÁXICOS DO REINO DE GALICIA | Adultos | Con Rafael Quintía

Plasmar nun mapa de Galicia unha escolma do rico imaxinario tradicional galego, cheo de seres máxicos que ás veces se estenden por toda a xeografía, outras están apegados a un antigo sitio arqueolóxico ou accidente xeográfico e nalgúns casos xa morreron, e deles só fica a súa memoria na antiga documentación. Ese é o obxectivo do mapa “Seres máxicos do reino de Galicia”, un póster que quere contribuir a amosar a diversidade de figuras míticas da nosa cultura e axudar a que sexan coñecidas e difundidas polas novas xeracións.
O mapa, guionizado por Manuel Gago e ilustrado por Leandro Lamas, será presentado por Manuel Gago, acompañado polo antropólogo Rafael Quintía, quen amosará a cultura material que a sociedade tradicional galega vinculaba con algún destes seres.
Con antelación á propia presentación, convidámosvos a un paseo por Compostela cos conferenciantes, para coñecer a pegada da fantasía e dos seres fantásticos na cidade de Santiago.

A MEMORIA MILENARIA DOS PETRÓGLIFOS

No marco do Festival Atlántica, Santos Estévez ofrecerá unha actividade especial centrada nos petroglifos de Bouza Badín, situados en Dodro. Estes gravados rupestres, declarados Ben de Interese Cultural, con deseños xeométricas e figuras zoomorfas, destaca polo seu emprazamento sobre o val do río Ulla e por conservar tradicións orais cuxa orixe podería estar na Prehistoria. A actividade incluirá unha visita guiada ao sitio arqueolóxico, onde o investigador explicará o contexto histórico e simbólico destas manifestacións artísticas.

Esta proposta busca achegar ao público a riqueza do patrimonio arqueolóxico galego, promovendo a súa valoración e conservación.

FERROL NA HISTORIA: A SÚA IGREXA DE SAN XIAO
Partirase dun punto entre o peirao e a praza pública. Salientaremos a feitura de Ferrol nos arredores de 1750, as rúas e o lugar onde estaba a igrexa vella e o porqué se destrúe. Seguiremos por Circunvalación ata chegar á igrexa concatedral de San Xiao. Comentarase o solar, a súa construción, as correspondencias entre o exterior e o interior e analizarase o interior nos seus detalles arquitectónicos, decorativos e simbólicos e outros detalles daquel tempo, ata a precipitada bendición da obra en 1772.

COA PALABRA NA BOCA | Adultos | 60 min
A través da palabra e a música de tradición oral percorreremos historias que falan da xente, do amor, da liberdade e da desobediencia, porque somos un pobo que discrepa e temos unha peculiar forma de enfrontrarnos á vida e á morte. Historias de disidencias cheas de heroínas que non existen nos libros e heroes sen nome.

VÉNME AO BICO UN CONTO | Adultos
Todos temos necesidade de escoitar e contar historias, pois é con elas que damos forma á complexidade da vida, restauramos a orde coa imaxinación, compartindo experiencias, escoitando ao outro, criando empatía e recuperando a esperanza no individuo e na comunidade.

O feito de contar e oír historias é, así, unha experiencia única, renovada constantemente pola complicidade entre quen conta e quen escoita.

Miguel Gouveia chega da Figueira da Foz, e trae “no bico un contar”. Un contar que mana da súa boca tan fresco, coa palabra tan viva, como chega a auga á bica da fonte. “Veume á bica un conto” como di Miguel, neste dito portugués é iso mesmo: un momento compartido en que teceremos a medias unha trama feita de palabras e silencios, que fai dos contos unha poderosa ferramenta do pensamento e da imaxinación.

ARTILOXIOS | Familiar (+8 anos) | 60 min
Artiloxios son dispositivos para un eloxio poético. Un remexido que se acompaña de artefactos electrónicos e mecánicos que marcan o ritmo ao actor.

Está, por exemplo, o grafitófono, que solfexa a resistencia eléctrica dun debuxo ao carboncillo. E o susurrófono, un fonocaptor pregoeiro do dixomedíxome. Ou o ascensor, un artiloxio ascensonórico evocador de alturas. pero hai moitos máis, todos eles para acompañar poemas de Maria Elena Walsh, Federico García Lorca, Gloria Fuertes, Gerardo Diego, Elsa Bornemann, Antonio Rubio… e de Oswaldo Felipe.

GARBEO CÓSMICO | Familiar (+6 anos) | 60 min
Garbeo cósmico é unha charla xograresca de introducción á astronomía a través da imaxe.
Un paseo cósmico-cómico que fala do ceo nocturno, do que se ve a través do telescopio e tamén do que non se ve. Un espectáculo onde se mesturan a poesía, a narración e o teatro e a xograría.

CABICIVAI | Familiar (+3 anos) | 45 min

CABICI VAI SUBINDO E BAIXANDO
CA BICI VAI DE ACÓ PARA ALÁ
CA BICI VAI CARRETANDO AS HISTÓRIAS
CA BICI VAI A GOLPE DE PEDAL

CABICIVAI é un espectáculo sobre rodas, unha bicicleta, un Kamishibai e tres caixóns dos que pode sair calquera cousa!!

Son animal  | Infantil | 45 min

O novo espectáculo de Paco Nogueiras está adicado aos animáis máis cercanos e aos seus sons convertidos en divertidas cancións.

Moi preto de nós viven toda clase de animais. Hainos grandes, pequenos, con pelo, plumas, cornos, rabo, con catro patas, dúas… ningunha. Todos diferentes e especiais, todos marabillosos. E todos… co seu son.

O bruar dunha vaca, o miañar dun gato, o ladrar dun can, o cacarexar dunha galiña, ou zunido do mosquito convértense en divertidas cancións da man de Paco Nogueiras. Cancións que nos levan polo mundo a través de diferentes estilos musicais: dende un aire portugués aos ritmos do leste de Europa, dende unha balada acústica a un animado rock & roll, dende unha fanfarra circense ate unha melodía de influencias andinas.

Preparémonos para cantar como animais, pois o gran son dos nosos amigos animais está a piques de comezar a soar.

A Ramona pequena | Público familiar | Concerto e contos
Contaremos e cantaremos a historia da Ramona pequena. A máquina do tempo leva a Ramona a súa infancia, Vivimos así unha nova aventura didáctica e rockeira rebordante de imaxinación e aprendizaxe.
Corría o ano 1967 no Courel e Ramona contaba con 6 aniños. Era unha nena movida por constantes inquedanzas, cunha mente esperta e imaxinativa. Adoraba perderse entre as páxinas de Xulio Verne, A volta ao mundo en 80 días, 20 mil leguas de viaxe submarino, Viaxe ao centro da terra e sobre todo un que lle espertaba a mais grande das curiosidades, Da terra á lúa, que lía unha e outra e outra vez. A Lúa era para ela unha fonte imparable de preguntas sen resposta: que tipo de leiras habería nela? Poderíase cultivar na súa superficie? Habería auga? Viviría alguén aí? Saberían, ou polo menos entenderían o galego? Sería mais grande que o Sol?
Moitas personaxes poderedes coñecer neste novo espectáculo, como a profe Lupe, que sempre escoitaba atenta as dúbidas da pequena, ou á súa amiga furona Nora, coa que consigue viaxar ata a Lúa! Con estas e outras personaxes chegaremos á fin desta viaxe, que nos ensina que a imaxinación non ten límites, a nosa cabeza é un taller de ideas onde os soños poden tornarse realidade.
Un espectáculo para compartir coas máis pequenas e coa familia. Pakolas tamén incluirá nesta montaxe algún dos seus éxitos anteriores dos libros Pakolas e Ramona Órbita, a dona do tempo.

MAL OU BEN DE AMORES? | Público adulto
Do amor, as súas infidelidades, argalladas e outros mesteres…
Amores haber hai: filiais, paternais, maternais, fraternais, maritais e mesmo extramaritais. Sofres, gozas, padeces, amoleces, quédache cara de espanto, de santo, de pedra, de fera, de idiota e ás veces ata dás a nota.

AGORA DESPOIS | Público adulto
Que chega despois do despois? Porque despois do agora, chega o agora, despois.
Un agora vou, un logo cóntoche, un estou niso, que xa estou, que xa chego, que si, que si… –e mentres, o tempo escapa…– que agora logo!

INESPERADAMENTE | Teatro para adultos
É un espectáculo teatral sobre poetas hispanas e latinoamericanas e o seu verso. Unha homenaxe a aquelas que marcaron a historia da literatura coa súa poesía e as súas historias.

UN NENO, UN CAN, UN GATO E UN PITO | Público familiar e infantil
O pito Kirico camiña, un can e un gato xogan, as miñas historias voan… ás veces contigo, outras con eles. Ven que cho conto.

DIVINOS ANIMAIS | Familiar e infantil
Enchéuseme a maleta de animais divinos con divinas historias. Coñécelas? Non? Pois ven que as contamos.

POMBAS, POEMAS E CONTOS | Bebés
Para espertar, bicos, no paseo, cóxegas, para comer, retrousos, para a sesta, un poema. E despois de xogar, merendar, cear… a escoitar versos, arrolos e contos.

Contos para orellas abertas | Infantil (+4 anos) | 50 minutos

Sesión de contos marabillosos para público a partir de 4 anos. A sesión ten unha duración de 50 minutos.

NO PAIS DAS COUSAS MARABILLOSAS 
O antropólogo Rafa Quintía convídanos a descubrir o fascinante mundo dos amuletos galegos nunha sesión moi especial onde se mesturan maxia, menciña popular e narración oral. “O mundo dos amuletos na cultura popular galega” non é unha charla ao uso: é unha viaxe chea de contos, lendas e saber tradicional. Acompañarémolo nunha sesión onde cada historia nos conecta co coñecemento ancestral herdado dos nosos devanceiros. Rafa ten o don de facer que escoitar sexa lembrar: rescata o que fomos e fainos rebuscar nas nosas memorias, cun estilo ameno, próximo e apaixonado. Un encontro para gozar, sorprendernos e recoñecer a forza da tradición que aínda vive en nós.

FARE LE CORNA | Adulto
En Italia adoitan “fare le corna” ou “toccare ferro” para botar lonxe a mala sorte.

E iso que moitos italianos cando lles preguntas “Sei superstizioso?” prefiren non dar unha resposta directa e recurren a Peppino de Filippo, gran actor do século XX: Non è vero ma ci credo!

As historias deste espectáculo poden aclarar ou non a cuestión, mais con elas imos pasar un tempo protexidos á italiana, que asemella moito á nosa.

Chi trova un ago e se lo prende,
la fortuna ormai lo attende.
Chi trova un ago e non lo raccoglie,
la sfortuna presto lo coglie.
Chi alla sfortuna non crede per niente,
fa la cosa più intelligent

XEOGRAFÍA DO IMAXINARIO | Familiar (+4 anos) | 50 min
Esquece o XPS, ven percorrer o mapa do imaxinario de Galicia. Precisas só ollos de curuxa, botas de tres leguas e orellas espreitando. Acharás así contos e lendas, ritos e mitos da tradición oral sobre esta nosa terra encantada.
Galicia ten un mapa que non sempre vemos, agochado para algúns, esquecido para a moitos, devecendo por ser percorrido e revelado de novo, para non morrer no esquecemento. Nel moran ocultos pequenos e grandes seres máxicos, vivos grazas ás contadas das eiras nos abafantes veráns, ou á calor do lume nas frías tardes de inverno. Xa for escoitando aduanadas dos trasnos, sentados a carón dun castro ou dunha fervenza, vendo voar bruxas a cabalo de vasoiras, descubrindo pedras que agochan tesouros, ou covas que gardan dragóns, escoitando cantos de xacias e sereas…

O COMEZO DO MUNDO | Adultos | 60 min
Mentres cociñamos a lume manso, contamos historias. Dende esta premisa, Sole Felloza percorre o país escoitando as mulleres. As voces desas mulleres suben ao escenario para contar de tempos sen tempo.
Esta uruguaia á quen sempre preguntan: e ti por que falas galego?
E ela sempre responde: e porque non?

Patios de luz | 70 min
A estrada que levaba do Eirado ó patio de luces tiña máis de cen curvas, era a estrada pola que marcharon as miñas veciñas, os meus avós, bisavós, tataravós, nós. E pola que volvemos.
Patios de luz é un percorrido por esas estradas de ida e volta, da aldea a cidade e dos patios de luces de volta á cortiña. Nos que as cancións e as historias van entretecéndose para contar e cantar unha historia común, a da emigración da aldea ós barrios e onde as protagonistas son as veciñas, a comunidade, o día a día, as hortas, o doméstico.
Porque os patios son as partes de atrás, onde dan as cociñas, onde se esconden as cousas que non se queren ensinar, onde se bota a roupa, a parte que nen sequera se pinta. Son o oposto ás fachadas. Onde pasan cada día miles de historias comúns que merecen ser cantadas, contadas e celebradas.
Os patios de luz son os nosos teatro.

Cacho Animalada | Público familiar (+3 anos) | 50 min

Vero Rilo e Luís Iglesias aventúranse nun camiño diverso, transitado por contos da nosa tradición oral, versións libres e revisitadas dos Contos de Fadas de Ángela Carter, contos de autor/a que xa son clásicos da literatura e álbum ilustrado infantil…

Todo o repertorio vai da man da música, da ledicia, dos animais e, por que non?, de certas
animalas… Son tempos de soltar as melenas e contar, cantar, bailar e correr coas feras que levamos dentro. Raposos, merlas, toupas, nenas, nenos… corredes con nós?

Lavandeiras | Público adulto
As mulleres á beira do río, de xeonllos, fregando a roupa, tecen unha estampa que se repetiu, forzosamente, ao longo da nosa historia. Ao seu redor, as lendas e as historias sucédense por toda a nosa xeografía, tanto física como identitaria: dende as lavandeiras nocturnas enchoupadas en sangue até o traballo colectivo das lavandeiras de Redondela, na Illa de San Simón.
Memoria histórica, igualdade, historias de vida, augas correntes, algo do que se calou e todo o que queremos contar e cantar para poñer as roupas a clareo.