Anxo Moure

Nado en Chantada o 28 de decembro de 1963, é un escritor e contacontos galego. Contacontos dende 1989 e barqueiro da A.C. Barcas do Miño con experiencia de 25 anos no manexo de embarcacións tradicionais e con actuacións no Miño e no Cabe, no Ulla e mais no mar da Illa de Arousa. As súas actividades son cómicas e divulgativas, enmarcadas no ecoloxismo e o ecopacifismo Impulsou a creación do Cinema Palleiriso na aldea de Garabelos, na parroquia de Mariz.

CONTOS NO ALTO DAS ÁRBORES | 20 minutos | Grupos reducidos de 10 persoas

Anxo Moure, o Carballo con Botas, convídavos a subir con el ao alto dun vello castiñeiro para dentro dunha casiña construída en madeira no alto da árbore polo carpinteiro Fernando Ibarra para escoitar contos e historias que nos axudan a coñecer e coidar dos bosques. Historias da “Sobreira Tecedeira”, do “Tío Teixo”, das “Árbores da paz”, do “Caramulo e a carpinteira dos soños”… Un conto contado coa barriga verde dos contacontos convida a unha viaxe, dende o alto das árbores, ata aos espazos naturais da Galiza: Courel, Ancares, Fragas do Eume…. Nesta viaxe a cativada e as súas familias coñecen a problemática dos bosques, limpan o lixo, loitan contra o trasno do lume, falan por “piñáfono móbil”, cociñan o vento e reciben a música das árbores da man dun peitoque de madeira de teixo.
No remate as familias coñecen as distintas árbores e as súas historias no horto forestal (32 especies autóctonas) e finaliza coa proxección dunha curtametraxe “Zapatiños de cartón e a carta das árbores” (con monicreques da autoría de Esteban Acuña “Tarabelos”) no “Cinema Palleiriso”.