Bea Campos

Bea Campos é actriz, narradora e presentadora. Dende moi nova, comezou a contar contos, realizou milleiros de actuacións e levou as súas historias ata o outro lado do mar, participando en festivais de artes escénicas en Latinoamérica. Forma parte de Migallas Teatro e tamén traballa na compañía Inventi Teatro ademais de participar como actriz en diferentes compañías. É formadora no eido da expresión dramática, da narración oral e da literatura infantil. Tamén colaborou nun gran número de proxectos audiovisuais e actualmente é presentadora na canle de difusión de literatura infantil Kalandraka TV achegando o mundo do libro a nenos e maiores.

Marcho que teño que marchar | Público adulto | 60 min
Marcho que teño que marchar é unha divertida sesión de contos pero tamén é un momento para a reflexión sobre os roles establecidos, a igualdade e a perspectiva de xénero. É un cesto de contos feito con vimbios de muller, xa que elas son as protagonistas. Dende meigas artúricas ata avoas misteriosas… E se mirades para os lados seguro que coñecedes máis mulleres de conto, protagonista dunha boa historia.
Na miña casa está moi mal visto andar falando do que sucede na familia. Pero que facer se diante túa acontecen cousas incribles? Se che contan historias e lendas misteriosas das que non se pode falar en alto… Pois segundo o meu punto de vista tiña dúas opción, calar para sempre ou artellar un divertido e teatral espectáculo de narración oral. Iso si, tédesme que gardar o segredo xa que todo o contado aconteceu de verdade.