Guillermo Llorca
Guillermo Llorca Freire, natural de Ferrol, é licenciado en Xeografía e Historia pola Universidade de Santiago de Compostela. Foi profesor numerario de instituto ata a súa xubilación. A súa obra de investigación e divulgación está publicada en máis de trinta libros, de autoría individual e compartida, e en centos de artigos en numerosos xornais e revistas. En canto aos seus traballos como historiador céntranse, principalmente, en temas e persoeiros relacionados con Ferrol. Algúns deles foron merecedores de recoñecemento institucional: Origen del Patronazgo de San Julián sobre la ciudad de Ferrol. Premio de Investigación Ingeniero Comerma do Concello de Ferrol, en 1985, e Los partidos políticos en Ferrol durante la II República. Premio de Investigación Jaime Quintanilla Martínez do Concello de Ferrol, en 1986. No campo da narrativa, a novela Cuando estalló la noche. El enemigo no sospechaba, foi finalista del Premio Literario Fernando Arenas Quintela 2021; e La noche decisiva. El regreso de Margaret Laugton foi gañadora del Premio Literario Fernando Arenas Quintela 2023. No 2022 foi nomeado coordinador local da exposición Cidades no Tempo: Ferrol, promovida pola Xunta de Galicia, Xacobeo 21-22, Fundación Cidade da Cultura de Galicia e Afundación. Obra Social de Abanca.
Ruta polo Ferrol ilustrado| Público adulto | En galego | De balde
Daremos un paseo polos barrios tradicionais que configuran a trama urbanística da cidade a partir da súa evolución histórica, dende o barrio medieval de Ferrol Vello e a orixe do Camiño Inglés, pasando polo barrio da Magdalena, modelo do racionalismo da Ilustración, coas súas galerías acristaladas e a arquitectura modernista de Rodolfo Ucha, ata chegar ao barrio obreiro de Esteiro, nacido na segunda metade do século XVIII co asentamento do primeiro proletariado ferrolán á beira do Estaleiro Real. Ao longo do camiño imos deternos nalgúns dos lugares máis singulares que dan algunhas das claves interpretativas da súa historia.