Laura Escuela
Laura Escuela (Tenerife, 1984) é narradora oral profesional e especialista en literatura infantil. Conta contos desde o ano 2009 e ten participado en numerosos festivais de narración das Illas Canarias, así como en diversos circuítos e festivais da península, e tamén en Chile, Perú e Escocia. Leva a cabo a xestión e execución de varios proxectos culturais e educativos para fomentar o achegamento da infancia e das familias aos libros e á literatura oral. Rodeada de mar por todas partes, di que a palabra é como un barco que achega, como un faro que guía, como unha beira á que regresar.
Meu mar | Con Caxoto
Un espectáculo de narración onde dúas beiras se atopan
Desde a illa ata a península, Meu mar propón unha travesía emocional e poética na que dúas voces —unha canaria e outra galega— se deixan levar polas correntes para atoparse no territorio común das historias.
Neste encontro íntimo, o mar é máis que escenario: é memoria compartida, é ponte e é espello. Laura e Caxoto, cunha voz enraizada nas súas terras pero aberta ao diálogo, fían contos que cruzan océanos e nos levan por camiños de salitre, vento e palabra viva.
Meu mar é unha homenaxe á oralidade como canle de encontro, á identidade que flúe, e á forza das historias que se contan desde as súas orixes pero sen fronteiras.