Manuel Gago
Manuel Gago (Palmeira, Ribeira, 1976), é xornalista, escritor e comisario de exposicións. É director de culturagalega.gal, a plataforma de divulgación cultural do Consello da Cultura Galega e profesor na Facultade de CC. da Comunicación da Universidade de Santiago de Compostela. Os seus últimos libros son a novela Nus (Xerais, 2021) e O sangue das pantasmas (Festival Atlántica e Libraría Couceiro, 2020). A súa última exposición é Galicia, un relato no mundo (Museo Gaiás, 2019). No ámbito da divulgación científica e cultural mantén colaboracións radiofónicas na Radio Galega e columnas en La Voz de Galicia, El Progreso e Diario de Pontevedra e é membro dos grupos de investigación en Novos Medios da USC e Romanarmy.eu.
VISITA GUIADA DA EXPOSICIÓN ‘SANTIAGO DE COMPOSTELA NO TEMPO’
A exposición Santiago de Compostela no tempo explora a interacción entre o urbanismo, a sociedade e o territorio que conforma a capital de Galicia, abranguendo distintas perspectivas como son a estética, a economía, a creación artística, a educación, a memoria e os imaxinarios locais. A través de cen pezas, entre obxectos e documentos, a exposición permite coñecer o legado cultural da cidade a través dunha coidada selección de obxectos, obras de arte, documentos, audiovisuais e interactivos que abren portas ao redor da cidade como un espazo de poder e de creación. A exposición está promovida pola Consellería de Cultura da Xunta de Galicia, a Cidade da Cultura e Afundación.