Paco Nogueiras

Diplomado en Graduado Social, músico e actor. Tras formarse cos artistas Andrés Pazos e Fabio Mangolini, impartiu clases de teatro e dirixiu representacións en entidades culturais e escolas. Foi actor e percusionista de Els Comediants e Os Quinquilláns. Foi membro do grupo folk Ophiusa, da Orquestra Os Modernos ademais e tamén da compañía de animación musical infantil Os Tres TENedORES. Participou en formacións de música tradicional e foi creador da banda sonora de varios espectáculos teatrais, musicais, de danza e da serie infantil Planeta Fantasía da TVG. Nestes momentos desempeña a súa actividade cos espectáculos “Brinca Vai!” (Premio Martín Códax da Música na categoría de Música Infantil no ano 2016), “Radio Bulebule” (Premio Martín Códax da Música na categoría de Música Infantil no ano 2021) e o último traballo titulado “Extra!” baseados nos libros editados coa Editorial Kalandraka, compaxinando co labor de contacontos na Campaña de Animación á Lectura que realiza Kalandraka polos centros escolares. Paco Nogueiras é un músico convertido a actor e un actor convertido en músico. Despóis de moitos anos en activo fíxoo recabar en formacións teatrais e musicais realizando diversas actuacións en escenarios nacionais e internacionais. Combina este labor coa de monitor de teatro e compositor para espectáculos. Os diferentes rexistros de Paco Nogueiras convérteno nun ser de espectáculo “todoterreo” capaz de afrontar retos de todo tipo.

Contos a centos | Público infantil | 45 min
Paco Nogueiras pretende afondar na normalización da nosa lingua dende as primeiras idades. Poesía, contos tradicionais e relatos de autor acordes á idade do público conforman o repertorio desta actividade, na que a narración oral enriquécese cun acompañamento musical elaborado expresamente para cada historia.
Retrousos e cancións fan que os nenos e as nenas poidan participar activamente nas sesións, acompañando as historias narradas coa voz, coas palmas ou con acenos.
Como ferramenta de coñecemento, aprendizaxe e transmisión da cultura, as sesións xiran arredor do libro e dánlle todo o protagonismo. E como morada natural dos libros, Paco Nogueiras aposta pola biblioteca escolar como espazo de encontro arredor da palabra e da oralidade, coa música como elemento dinamizador.