Simone Negrín

Actor, director, músico e pedagogo. É narrador oral desde 2015. Conta historias reais para o público adulto, pesca no mundo do Decamerón para o público adolescente e recrea historias de Gianni Rodari para a infancia. Este italiano ten a enorme capacidade de fixar a súa atención sobre calquera acontecemento ou detalle e transformalo en material de conto. Así, cunhas apostas moi atrevidas e temerarias, consegue que os materiais reais funcionen como calquera conto ou relato, pois as súas historias están cheas de humor e tenrura, e mesmo de delicada crítica social. Ten o seu propio estilo: desmontar as historias, reais ou ficticias, partilas e ofrecelas ao público para que saboree cada detalle ata que ao final todo encaixe con gusto e harmonía. Como narrador empezou a contar nos concertos didácticos da Real Filharmonía de Galicia, recibiu o Premio do Público nas Xornadas da ONG SOS Racismo, foi seleccionado entre os Narradores Inauditos do Maratón de Contos de Guadalaxara e foi convidado os Festivais O Caribe Conta e Akuentajuî de Colombia.