Vero Rilo e Luís Iglesias

Vero Rilo é narradora oral. Antes era educadora infantil, pero quitouse diso. Dende 2013 leva contando contos, historias de vida, e outras lerias para todo tipo de público. A música está moi presente nos seus traballos a dúo aínda que, por máis que o intente, nunca aprenda a cantar nin a tocar a pandeireta. Tamén conta soa, é na variedade que atopa o gusto. Feminismo, tradición, memoria histórica, resistencia, alegrías, afectos e rebeldías aparecen consciente e inconscientemente no seu repertorio. Sempre lembra as palabras de Castelao “cada vida é una novela que se perde”. Se cadra é por iso que conta para non perder. E conta o que aprendeu a ser, o que outras foron, o que son. Conta o que a (con)move, di que así a memoria non morre… Luís Iglesias ten unha formación musical heterodoxa, estudando Jazz no Taller de músicos de Madrid, así coma en Estudio Escola de Música en Santiago de Compostela. Estuda guitarra clásica co mestre Rubén Abel e solfexo segundo o método Kodaly da man de Sergio de la Osa. Participa en múltiples bandas de estilos tan diversos coma folk ou rock: Brandelia, La Pelvis, Reino Animal, Trikornio...